وبسرح وابيع الحكاوي القديمة..

واوزّع غناوي على المشتاقين..

وبعمل صيانة لحاجات ليها قيمة..

‎وبقبل تبادل كلام العينين

ظروفي العسيرة..

‎في قلب المسيرة

بقولها واصرّخ في وسط الهتاف..

ماحدش سمعني.. ولا جابلي سيرة..

بيسرح كلامي ما بين الآلاف..

بخزّن واجمّع في كل اللي فات..

‎وبحكي حكايات

بشيل ابتسامتك بعيد ع الحاجات..

مع الذكريات..

واشوفك واداري في قطع القميص..

واشمّر دراعي..

وبعمل عريس..

واقول انك أجمل من اجمل حكاية..

وأحلى من احلى شوارع باريس..

ونرقص شويّة في حضن الرصيف..

ونفضل نغنّي أغاني الخريف..

واقولّك "بحبك".. ونقلبها سيما..

‎وبسأل: توافقي نكون مبسوطين؟

‎ونسرح نبيع الحكاوي القديمة؟

‎نوزّع غناوي على المشتاقين؟

- مايكل عادل