نا جاي متعشم ألاقيك

ومراهن على إني هشوفك..

وأديني لقيتك في مكانك

قاعد بين ورقَك وحروفك..

نفس حياتك

نفس ظروفَك

لسه على عنيك باين خوفك

من كُل غريب جاى بيسلِّم..

لسَّاك مُتَردد كالعادة،

والقهوة بتشربها زيادة،

وبتنهج لمّا بتتكلم..

لسّاك بتآمن وتسَلِّم

بحكاوي زمان،

والندّاهة..

وكلام العرّافَة إياها،

والفرصة اللي حكيتلك عنها

وفِضِلْت كتير تستنّاها..

لسّاك متغرَّب في متاهة

تهرب من شَبَكَه لصنّارة..

وملامحك هياها ملامحي

من غير الشيب والنضّارة..

أنا جيتلك لكن يا خسارة،

أحلامي وأحلامك ماتوا...

أنا إنت، وجايلَك يتطّمن

لكن من تلاتين سنة فاتوا..