كان فيه زمان فالمدرسة ديّا
بنوتة حلوة مؤمنة بيّا
بتحبّني مُشاغب
واعشق منامها ف الحصص
وشعرها السايب
ومهما تداري حبها ليا..
عارف إنها بتبكي..
لما ابقى يوم غايب
تحدف قلمها عليا لما اكون مشغول
وعنيها تيجي ف عنيّا ..
تدّارى ف الكشكول
ولما ييجى الامتحان أسقط وغششها
ولما يدّوا الأوائل ..أحلم تكون هيّ
كان فيه زمان فالمدرسة ديّا
بنوتة حلوة مؤمنة بيّا
خلصت سنين المدرسة والعمر خدنا معاه
كبرت عليا المدرسة، وصبحت حياة
فيها بنات الأصول
وبنات تحب الوصول
وبنات تموت ف الدلع ولا فاهمة حاجة سواه
أشمعنى حب الفصول
مبيفهموش معناه
عدّيت على المدرسة ودموعى ف عنيا
كان فيه زمان فالمدرسة ديا
بنوتة حلوة مؤمنة بيا
#ميدو_زُهير
Comments
Post a Comment