بحبك جديد

 يا ريحة شيكاغو ف ساعة العصارى...

يا بيروت بَحِبك و معييش مَصارى...

ف موسكو استويت م البياض و الجليد...

ف لندن عَمانى الضباب الشديد...

يا ريحة زمان جُوَّا طهران و فارس ...

يا شكل التلامذة ف بكين و المدارس...

يا ريحة البارود فوق حُطام المتارس...

ف غزة و طعم التراب و الحديد...

بَحِبك جديد...

زَى حُب المدينة..

لواحد بيعرفها غيباً و صَم ...

كَعِشق الموسيقى لواحد أصم...

كَعِشق الكراسى لواحد ما جاش..

كعشق الوظيفة لسن المعاش...

كعشق اللى تابوا...

عن الزهر فجأة...

و عشق المفاجأة لدور ما انتهاش..

كعِشق الحياة للّى فارقوها بدرى..

و قد اشتياق الكفن للشهيد...

بَحِبك جديد...

#مصطفى_إبراهيم