عندي وجهة نظر, عادة الناس بتقول ان كده كده الخير والاحسن هم المكتوبين في المستقبل وانا مصدق في الكلام بس لسبب مختلف شوية, انه كمان الشر والاسوأ برضه مكتوبين في المستقبل والا نبقى مش عايشين بنعمل حاجة. انا والله ما بؤمن بافكار لينين مثلا او حاجة, بس هو الوضع اللى الحياة بتوريهولي في خبرتي الصغيرة فشخ دي هو ان كل ما هتتفشخ اكتر هيجيلك حاجة تنجحك اكتر ومش شرط دايما الشر ييجي الاول. مثالين اسرع من بعض, انا نجحت في ثانوية بمجموع كويس وحياتي مشيت سالكة ودخلت زويل مباشرة وكله تم بسلكان لا مثيل له, في المقابل قعدت اول سنة في زويل بعاني معاناة لا مثيل لها. مثال اسرع ان امبارح كان يوم productive ومريح فشخ وعملت فيه حاجات كتير تريح النفسية في المقابل صحيت على حاجة مش حوار اوي ولا حاجة بس بطريقة ما الظروف والخضة واني مش نايم كويس جالى ضيق تنفس وقلق محصلوليش من كام سنة وقضيت كام ساعة اقذر من بعض, ودلوقتي من نص ساعة عرفت ان قريبي لما اتسأل في انترفيو الجامعة مين مثلك اللى تحب تبقى زيه اختارني انا, ف هو الكومبينيشن دي مفيهاش حلو بس او وحش بس ومحدش يعني هيتبسط بيها في كل الاحوال بنتعايش بس, وكل ما هتتعايش هتسوء اكتر طبعا وهكذا بس ده الامر الواقع بقى, مش معنى كده انك مش هتقلق وتتفشخ, معني كده انك هتبقى عارف ان قلقك هيخلص مهما بقى الدنيا عمالة تعلي عليك وتديك في وشك.