Thoughts after midnight

" التعلم في الصغر كالنقش على الحجر" بانطلاق ثورة يناير كان عمري 11 سنة, تكوين وعيي وأفكاري كان منغمس كله في أحداث الثورة والتبعات السياسية ورؤيتي للأمور ومتابعتي لكل مظاهر الاخلاص والغش, القتل والتضحية, وكل شئ وعكسه في البلد شكل في وجداني مبادئ تكونت بعد بزوغ أسئلة عن جذور الحق وكيفية تطبيقه وعن ازاى نقدر نحلم بوطن أفضل يساع الكل قبل أى شئ, ازاى نقدر نتبني الأفكار ونستخدمها ونطبقها من غير استقطاب شعبي ورفض طوائف ان شالله حتى لو بيكفرونا, الموضوع مكانش مجرد تفكير سلمي في ازاى نقدر نشيل نظام ونلغي توريث ونركب مكانها ديموقراطية حقيقية ونعيش الحلم الأمريكي, اللى متصدرلنا في الشاشات, هنا في مصر. الموضوع كان تغيير ثقافة المجتمع وتمكين الناس من انها تاخد قراراتها بعقولها وانها ترسم طريق لحياتها مع وضع اعتبار لاخوانهم في الوطن ايا كان مرجعهم, تفكيرهم السياسي او اعتقادهم الديني. وضع أفكار زى دي في عقل طفل بيخليه أكثر تسامح مع اى اختلاف جذري يشوفه ويلاحظه, بيخليه يقدر يتبني فكرة وبعد سنين من الايمان بيها يكتشف انه لا الفكرة محتاجة تعديل ومحتاجه نراجع جذورها عشان الايمان مبيجيش بالتواتر...

 بلاش انتي  كفاية العالم البائس مكشّرلي.... دا لمّا الضلمة تحاوطني،  بجيب سيرتك تنوّرلي... وطيفك لما يظهرلي،  بيفتح قلبي ع الدنيا... واقوم اشقى عشان أوصل   واحاول مرّة في التانية... واحاسب نفسي ع الثانية  عشان ما تروحش ع الفاضي.. كفاية ما راح من الدنيا  كفاية ما ضاع من الماضي... وجيت وانا قلبي مش راضي،  وناقص، وانتي تكملتي.. عشان خاطري  بلاش انتي...

 كل الطرق صعبة, الصح صعب والغلط صعب. اختار طريقك بناء على الصح والغلط مش على أساس ايه الطريق اللي هتعذب نفسك بيه أكتر وتفتكر انك كده هتنجح اكتر.

 لصالح مين؟ وايه الحكمة يتأخر لقانا سنين؟ وليه كل اللي كان لازم يكون حاصل، حصل بعدين؟ وفين كنا، بنعمل إيه؟ وفين العمر، عدّى ف إيه؟ وفي الآخر  قابلتك ليه؟ وليه دلوقتي متفارقين؟ لصالح مين؟

مود كل ليلة ماتش مهم او امتحان, حب وتوتر وحزن, الحب بكل انواعه بيتداخل, حب الزمالك حب الوطن حب الحرية, حب البنت اللى بتحبها حب الدراسة, والتوتر بكل انواعه, شوية تhyper شوية كل حاجة تقفل معاك, والحزن بكل انواعه, شوية حزن ع اللى فات وحزن ع اللى جاى وحزن ع اللى محصلش وحزن جاى معاه غضب وحزن ببكا وحزن باغاني بيتحول لفرحة عادي بمجرد تغيير الbeat.  كل المشاعر متداخلة وكل الناس والعلاقات والمشاعر اللى متكون منها عقلك مربوطة ببعض لدرجة تخلي الحياة جميلة, مش جميلة بالرغم من حزنك لا, جميلة عشان انت بتحزن.